ပိုင်နက်အငြင်းပွားမှုကြောင့်တင်းမာနေသောအာရှပစိဖိတ်နိုင်ငံများ ငြိမ်းချမ်းရေးရှေးရှုကြရန် ဟူဂျင်တောင်တိုက်တွန်း

ဗလာဒီဗိုစတော့၊ စက်တင်ဘာ - ၈

ပိုင်နက်အငြင်းပွားမှုများကြောင့် တင်းမားမှုမြင့်တက်လျက်ရှိသော အာရှပစိဖိတ်နိုင်ငံများအနေဖြင့် ဒေသတွင်း၌ ငြိမ်းချမ်းရေးခိုင်မြဲအောင်တည်ဆောက်ကြရန် တရုတ်သမ္မတ ဟူဂျင်တောင်က တိုက်တွန်းပြောကြားလိုက်သည်။

“အာရှပစိဖိတ်ဒေသမှာ ငြိမ်းချမ်းရေးနဲ့တည်ငြိမ်ရေးကိုထိန်းသိမ်းဖို့နဲ့ စီးပွားရေးအရှိန်အဟုန်တိုးတက်ကောင်းမွန်ဖို့ဟာ ဒေသတွင်းနိုင်ငံတိုင်းရဲ့အကျိုစီးပွားဖြစ်ပါတယ်။အဲဒါက ကျွန်တော်တို့အားလုံးမျှဝေယူရမဲ့တာဝန်လည်းဖြစ်ပါတယ်”ဟု ရုရှားနိုင်ငံတွင်ပြုလုပ်သည့် အာရှပစိဖိတ်စီးပွားရေးပူးပေါင်းဆောင်ရွက်ရေးအဖွဲ့(APEC)ထိပ်သီးဆွေးနွေးပွဲသို့တက်ရောက်ရန်ရောက်ရှိနေသော တရုတ်သမ္မတ ဟူဂျင်တောင်ကပြောကြားသည်။

တရုတ်သမ္မတ ဟူဂျင်တောင်သည် အေပက်ထိပ်သီးဆွေးနွေးပွဲမစမီ တောင်တရုတ်ပင်လယ်တွင်းရှိ ပိုင်နက်များနှင့်ပတ်သက်၍ အငြင်းပွားနေသော နိုင်ငံများဖြစ်သည့် ဗီယက်နမ်နှင့် ဘရူနိူင်းနိုင်ငံများနှင့်သီးခြားစီတွေ့ဆုံဆွေးနွေးခဲ့သည်။

တရုတ်သမ္မတဟူဂျင်တောင်းသည် ဗီယက်နမ် သမ္မတ Truong Tan Sang နှင့်တွေ့ဆုံခဲ့ရာတွင် လက်ရှိဖြစ်ပွားလျက်ရှိသောပိုင်နက်အငြင်းပွားမှုနှင့်ပတ်သက်၍ နှစ်နိုင်ငံစလုံးအလျော့ပေး၍ ငြိမ်းချမ်းစွားအဖြေရှာနိုင်ရန် နှစ်နိုင်ငံပူးပေါင်းလုပ်ဆောင်သင့်ကြောင်း တရုတ်သမ္မတ ဟူဂျင်တောင်က ဗီယက်နမ်သမ္မတ Truong Tan Sang ကိုပြောကြားခဲ့သည်ဟု China Daily သတင်းတွင်ဖော်ပြထားသည်။

တရုတ်နှင့်ဗီယက်နမ်တို့သည် အဆိုပါပိုင်နက်အငြင်းပွားနေသော ကျွန်းစုများနှင့်ပတ်သက်၍ တိုက်ပွဲ ၂ကြိမ်ဖြစ်ပွားခဲ့ဖူးသည်။

၁၉၇၄ခုနှစ်က တောင်တရုတ်ပင်လယ်တွင်းရှိ ပါစယ် ကျွန်းပိုင်နက်လုရာတွင် တရုတ်နှင့်ဗီယက်နမ်တို့တိုက်ပွဲဖြစ်ပွားခဲ့ပြီး ဗီယက်နမ် တပ်သား ၅၃ဦးကျဆုံးခဲ့သည်။

ထို့အတူ ၁၉၈၈ ခုနှစ်ကလည်း အဆိုပါဒေသရှိ ကျောက်တန်းပိုင်ဆိုင်မှုအတွက် တိုက်ပွဲဖြစ်ပွားခဲ့ပြီး ဗီယက်နမ်တပ်သား ၇၀ ကျော်ကျဆုံးခဲ့သည်။

The Voice Weekly

 

ရဲဘော်သုံးကျိပ်ဝင် ဗိုလ်မှူးချုပ်ကျော်ဇော ကို မြန်မာနိုင်ငံပြန်လာရန် ခွင့်ပြု

မြန်မာနိုင်ငံပြန်လာ၍ ရွှေတိဂုံစေတီတော်ကို ဖူးမျှော်လိုသည်ဟု ထုတ်ဖော်ပြောဆိုလာသော ရဲဘော်သုံးကျိပ်ဝင် ဗိုလ်မှူးချုပ်ကျော်ဇော ကို နိုင်ငံတော်သမ္မတကြီး ဦးသိန်းစိန်က မြန်မာနိုင်ငံပြန်လာရန် ခွင့်ပြုလိုက်ပြီး ပြန်လာပါကကြိုဆိုပါကြောင်း၎င်း၏မိသားစုကိုအကြောင်း ပြန်ကြားထားသည်ဟု နိုင်ငံတော် သမ္မရုံး ၀န်ကြီး ဦးအောင်မင်းက The Voice Weekly ၏မေးမြန်းချက်ကို ပြန်လည်ဖြေကြားသည်။

နေပြည်တော်ရှိ သမ္မတရုံးတွင် ယနေ့(စက်တင်ဘာလ ၇ရက်)ကျင်းပနေသော Peace Donor Support Group ၏ဒုတိယအကြိမ် ဆွေးနွေးပွဲကျင်းပနေစဉ် The Voice Weekly ၏မေးမြန်းမှုကို ၀န်ကြီးဦးအောင်မင်းက ယင်းသို့ပြန်လည်ဖြေကြားခြင်းဖြစ်သည်။

နိုင်ငံတော်သမ္မတကြီးက ဗိုလ်မှူးချုပ်ကျော်ဇော၏ မြန်မာနိုင်ငံပြန်လာလိုပြီး၊ ရွှေတိဂုံစေတီတော်ကို ဖူးမျှော်လိုသည့်ဆန္ဒကိုသိရှိပြီးရဲဘော်သုံးကျိပ်ဝင်ခေါင်းဆောင်တစ်ဦးဖြစ်သည့်အပြင် မြန်မာနိုင်ငံသားတစ်ဦး ၏ ရွှေတိဂုံစေတီတော်ကိုဖူးမျှော်လိုသည့်ဆန္ဒကိုအလေးအနက်ထားသည့်အတွက် ပြန်လာရန်ခွင့်ပြုလိုက်ပြီး ကြိုဆိုလိုက်ခြင်းဖြစ်ကြောင်း သမ္မတကြီး၏ ယင်းသဘောထားကို ဗိုလ်မှူးချုပ်ကျော်ဇော်၏ သမီးဖြစ်သူ ဒေါက်တာလှကျော်ဇော ကို အကြောင်းပြန်ကြားထားပြီးဖြစ်သည်ဟု ၀န်ကြီးက ရှင်းပြသည်။

“သမ္မတကြီးရဲ့ဒီလိုသဘောထားက အမျိုးသားပြန်လည်သင့်မြတ်ရေးအတွက် အချက်တစ်ချက်အနေနဲ့ ကြိုဆိုရမှာပါ”ဟု မြန်မာနိုင်ငံရေးလေ့လာသူ ဦးလှမောင်ရွှေကသုံးသပ်သည်။

တရုတ်ပြည်သူ့သမ္မတ နိုင်ငံတွင် အခြေချနေထိုင်နေသည့် အသက် ၉၃နှစ်အရွယ် ဗိုလ်မှူးချုပ်ကျော်ဇောမှာ ယနေ့အချိန်အထိသက်ရှိထင်ရှား ကျန်ရှိနေသည့် ရဲဘောသုံးကျိပ်ဝင်နှစ်ဦးတွင် တစ်ဦးအပါအ၀င်ဖြစ်ပြီး လတ်တလောတွင် တရုတ်ပြည်သူ့သမ္မတနိုင်ငံ ယူနန်ပြည်နယ်ရှိ ကူမင်း အထွေထွေရောဂါကုဆေးရုံတွင် တက်ရောက်ဆေးကုသမှုခံယူနေခြင်းဖြစ်သည်။

မြန်မာ့တပ်မတော် အရာရှိဟောင်းတစ်ဦးဖြစ်ခဲ့သူ ဗိုလ်မှူးချုပ်ကျော်ဇော ကို အဖဦးပန်း၊အမိဒေါ်တင့်တို့က ၁၉၁၉ ခုနှစ် ဒီဇင်ဘာ ၃ ရက်နေ့၊ တွင် သာယာဝတီခရိုင်သုံးဆယ်မြို့နယ်ဆိုင်းစုရွာ၌ မွေးဖွားခဲ့ပြီး မွေးချင်း ၆ ယောက် အနက် ဒုတိယမြောက်သားဖြစ်သည်။

၁၉၄၁ ခုနှစ် ဧပြီလ ၁၃ ရက်နေ့တွင် ဂျပန်ပြည်သို့ စစ်ပညာသင်ကြားရန် ရဲဘော်သုံးကျိပ် အဖွဲ့ဝင်အဖြစ် လိုက်ပါသွားခဲ့သည်။ ၁၉၅၃ခုနှစ် မတ်လတွင် ရှမ်းပြည်အတွင်း ကူမင်တန် တရုတ်ဖြူတပ်များ ကျူးကျော် ၀င်ရောက်မှု့ကို တွန်းလှန် တိုက်ခိုက် သည့် ဗမာ့တပ်မတော် စစ်ဆင်ရေးများ၌ ဦးဆောင်ခဲ့သည်။

၁၉၅၇ ခုနှစ် ဧပြီလတွင် ဗမာ့တပ်မတော်မှ ထုတ်ပယ်ခြင်းခံခဲ့ရကာ ၁၉ရ၆ ခုနှစ်တွင် ဗမာပြည်ကွန်မြူနစ်ပါတီ အခြေစိုက်ရာ တရုတ်နယ်စပ်သို့ မိသားစုနှင့်အတူ ထွက်ခွာလာခဲ့ပြီး ၁၉ဂ၉ ခုနှစ် ဗကပ ပြိုကွဲချိန်တွင် တရုတ်ပြည်၌ ခိုလှုံကာ ယခုအခါ ယူနန်ပြည်နယ် မြို့တော် ကူမင်းမြို့၌ နေထိုင်လျှက် ရှိသည်။

The Voice Weekly

ဦးဥတ္တမနေ့အခမ်းအနားကို စစ်တွေမြို့နှင့် ရခိုင်ပြည်နယ် တစ်ဝန်းလုံးတွင် ကျင်းပပြုလုပ်သွားမည်

လွတ်လပ်ရေး၏ မီးရှူးတန်းဆောင် ဆရာတော် ဦးဥတ္တမနေ့ အခမ်းအနားကို ၂၀၁၂ ခုနှစ် စက်တင်ဘာလ ၉ ရက်နေ့(ဦးဥတ္တမနေ့)တွင် စစ်တွေမြို့နှင့် ရခိုင်ပြည်နယ် တစ်ဝန်းလုံးတွင် ကျင်းပပြုလုပ်သွားမည်ဖြစ်ကြောင်း သတင်းရရှိပါသည်။

ဆရာတော်ဦးဥတ္တမနေ့တွင် ဆရာတော်၊ သံဃာတော်များအားပင့်ဖိတ်ပြီး ဆွမ်းဆက်ကပ်လှူဒါန်းခြင်း၊ ဦးဥတ္တမပန်းခြံအတွင်းရှိ ဦးဥတ္တမ ကြေးရုပ်ရှေ့တွင် ဆီမီး၊ အမွှေးတိုင်များ ထွန်းညှိပူဇော်ခြင်း၊ လွမ်းသူ့ပန်းခွေများဖြင့် ကြည်ညိုပူဇော်ခြင်းများကို ခွင့်ပြုပေးသွားမည်ဖြစ်ကြောင်းဖြင့်လည်း သိရသည်။

ဆရာတော်ဦးဥတ္တမနေ့ကို ၂၀၁၁ ခုနှစ်မှစတင်ကာ လွတ်လပ်စွာ ကျင်းပလာနိုင်ခြင်းဖြစ်ကြောင်း သိရသည်။

''အရင်တုန်းကကတော့ ဆရာတော်နေ့မှာ လွမ်းသူပန်းခွေချတာတို့၊ ဆရာတော်အကြောင်း ဟောပြောတာတွေကို လွတ်လပ်စွာ ပြုလုပ်ခွင့်မရခဲ့ဘူး။ အမြဲစောင့်ကြည့်ခြင်း ခံခဲ့ရတယ်။ အခုအစိုးရသစ်လက်ထက်မှာတော့ နေ့ထူးနေ့မြတ်တွေကို လုပ်ခွင့်ရလာတာ ၀မ်းသာကြိုဆိုပါတယ်''ဟု စစ်တွေမြို့ခံတစ်ဦး ကပြောသည်။


Ref:EMG
Posted By Admin-KMO

Fire tablets အမျိုးအစား သစ်နှစ်မျိုးနှင့် “paperwhite” Kindle e-readers များ စတင်မိတ်ဆက်

လော့စ်အိန်ဂျလိစ် စက်တင်ဘာ၇

Fire tablets အမျိုး အစားသစ် နှစ်မျိုးနှင့် အသုံးပြု သူများ အနေဖြင့် အမှောင် ထဲမှာပင် ဖတ်ရှု နိုင်စွမ်း ရှိသည့် paperwhite Kindle e-readers အမျိုးအစား e-readers များကို အမေရိကန် ပြည်ထောင်စု လော့စ်အိန် ဂျလိစ်မြို့ရှိ Amazon ကုမ္ပဏီက ပွဲဦးထွက် မိတ်ဆက်ခဲ့ ကြောင်း အင်တာနက် သတင်း တစ်ရပ် အရ သိရသည်။

Fire tablets အမျိုးအစား သစ်နှစ်မျိုး အနက် တစ်မျိုးမှာ ၇ လက်မအရွယ် အစားရှိပြီး 4G-ready version ထည့် သွင်း အသုံးပြုထား သဖြင့် ၄င်းပစ္စည်း၏ ဈေးနှုန်းမှာ အမေရိကန် ဒေါ်လာ ၄၉၉ ဒေါ်လာ တန်ဖိုး ရှိကြောင်း၊ ဒုတိယ အမျိုးအစား ဖြစ်သည့် Amazon မှာ ၈ ဒသမ ၉ လက်မအရွယ်အစားရှိပြီး Fire HD Wi-Fi version ထည့်သွင်း အသုံးပြု ထားသဖြင့် ဈေးနှုန်းမှာ အမေရိကန် ဒေါ်လာ ၂၉၉ ဒေါ်လာ တန်ဖိုး ရှိကြောင်း ၄င်းပစ္စည်း မိတ်ဆက် ပွဲတွင် Amazon ကုမ္ပဏီ တည်ထောင်သူ လည်းဖြစ်ပြီး အလုပ် အမှုဆောင် အရာရှိချုပ် တစ်ဦးလည်း ဖြစ်သည့် ဂျက်ဖ်ဘီဇိုစ် က ပြောကြားခဲ့ သည်။ထို့ပြင်ယခု မိတ်ဆက်သည့် Paper-White Kindle e-ereaders တွင်လည်း Wi-Fi နှင့် 3G Version ထည့်သွင်း အသုံးပြု ထားပြီး တန်ဖိုး အားဖြင့် အမေရိကန် ဒေါ်လာ ၁၁၉ ဒေါ်လာနှင့် ၁၇၉ ဒေါ်လာ တို့ဖြင့် ရောင်းချ သွားမည် ဖြစ်ကြောင်း ဘီဇိုစ်က ဆက်လက် ပြောကြား ခဲ့သည်။

မြ၀တီ