သဘာဝဓာတ်ငွေ့နှင့် လျှပ်စစ် ကဏ္ဍတွင် ပုဂ္ဂလိက ရင်းနှီးမြှုပ်နှံမှု တိုးမြှင့်မည်

ရန်ကုန် ၊ စက်တင်ဘာ ၄

အစိုးရကသာ နှစ်ပေါင်းများစွာ ထိန်းချုပ်ထားသည့် မြန်မာနိုင်ငံ၏ သဘာဝ ဓာတ်ငွေ့နှင့် လျှပ်စစ် ကဏ္ဍများတွင် ပြည်တွင်း၊ ပြည်ပ ပုဂ္ဂလိက ရင်းနှီးမြှုပ်နှံမှုများ တိုးမြှင့် သွားမည်ဖြစ်ကြောင်း စက်တင်ဘာလ ၄ ရက်နေ့တွင် ဒုတိယအကြိမ် ကျင်းပသော မြန်မာ့ရေနံ ၊ သဘာဝဓာတ်ငွေ့ နှင့် လျှပ်စစ် ကဏ္ဍ နိုင်ငံတကာ ရင်းနှီးမြှုပ်နှံမှုများ ထိပ်သီး အစည်းအဝေး၌ စွမ်းအင်ဝန်ကြီး ဦးသန်းဌေးက ပြောကြားသည်။

လက်ရှိ အစိုးရပိုင် လုပ်ကွက်များကို ပုဂ္ဂလိကသို့ ချပေးတော့မည် ဖြစ်ပြီး ၊ နိုင်ငံတကာ ရင်းနှီးမြှုပ်နှံမှုများ အတွက်လည်း နိုင်ငံခြား ရင်းနှီးမြှုပ်နှံမှု ဥပဒေ ကို ရေးဆွဲနေသည့် အပြင် အမျိုးသား ဖွံ့ဖြိုး တိုးတက်ရေး စီမံကိန်း ပါဝင်သည့် စွမ်းအင် ကဏ္ဍ အထူးသဖြင့် လျှပ်စစ် ကဏ္ဍကို နိုင်ငံတွင်း လုံလောက်စွာ ရရှိနိုင်ရန် ကြိုးစားသွားမည့်ကြောင်း ၄င်းက ထပ်လောင်း ပြောသည်။

အလားတူပင် ယနေ့ ကျင်းပသော ဆွေးနွေးပွဲတွင် ကမ်းနီး ကမ်းဝေး ရေနံတွင်းများနှင့် ပက်သက်ပြီး စွမ်းအင်ဝန်ကြီး ဌာန ၊ စွမ်းအင် စီမံခန့်ခွဲရေး ဦးစီးဌာနက တွဲဖက် ညွှန်ကြားရေးမှူး ဦးအောင်ကျော်ထူးက ရှင်းလင်း ပြောကြားခဲ့ပြီး၊ မြေမျက်နှာပြင်အနေအထားအလိုက် ရေနံနှင့်သဘာဝဓာတ်ငွေ့ထွက်ရှိသည့်   နေရာများကို အဆိုပါ ဝန်ကြီး ဌာနမှ ဘူမိဗေဒ ပညာရှင် ဦးသန်းမင်းက ရှင်းလင်း ပြောကြားသည်။

အဆိုပါ စွမ်းအင်ကဏ္ဍ ဆွေးနွေးပွဲကို စက်တင်ဘာလ ၃ ရက်နေ့မှ ၆ ရက်နေ့ထိ ဆီဒိုးနား ဟိုတယ်တွင် ကျင်းပ သွားမည်ဖြစ်ပြီး ၊ ပြည်တွင်းရှိ စွမ်းအင် ကုမ္ပဏီများအပြင် နိုင်ငံပေါင်း ၃၀ကျော်မှ ကုမ္ပဏီ ၁၅၀ ကျော်လည်း တက်ရောက် ခဲ့ကြသည်။

REF: The Voice Weekly

လစ်လပ်နေသော ပြည်ထောင်စု ဝန်ကြီးနေရာ များအတွက် ခန့်ထားမည့် ပြည်ထောင်စုဝန်ကြီး စာရင်းကိုနိုင်ငံတော် သမ္မတကြီးက ပြည်ထောင်စု လွှတ်တော်သို့ အတည်ပြုချက် ရယူရန် သဝဏ်လွှာပေးပို့ထား

လစ်လပ်နေသော ပြည်ထောင်စု ဝန်ကြီးနေရာ များအတွက် ခန့်ထားမည့် ပြည်ထောင်စုဝန်ကြီး စာရင်းကိုနိုင်ငံတော် သမ္မတကြီးက ပြည်ထောင်စု လွှတ်တော်သို့ အတည်ပြုချက် ရယူရန် သဝဏ်လွှာပေးပို့ထားကြောင်း The Voice Weekly သတင်းရင်းမြစ်များက ပြောကြားသည်။

နိုင်ငံတော် သမ္မတ၏ သဝဏ်လွှာတွင် ပါရှိသော ပြည်ထောင်စု ဝန်ကြီး အဖြစ် ခန့်ထားမည့် ပုဂ္ဂိုလ်များမှာ

(၁) ဦးအေးမြင့်ကြူ ( လက်ရှိ - အား.ကာ ဒုဝန်ကြီး ) 
(၂) ဗိုလ်ချုပ်ဇေယျာအောင် ( မြောက်ပိုင်းတိုင်း စစ်ဌာနချုပ် တိုင်းမှူး )
(၃) ဒေါက်တာမြင့်အောင် ( ပြည်ထောင်စု ရာထူးဝန် အဖွဲ့ )
(၄) ဦးကျော်လွင် ( လက်ရှိ - ဆောက်လုပ်ရေး ဒုဝန်ကြီး )
(၅) ဦးဝင်းရှိန် ( လက်ရှိ - ဘဏ္ဍာ/အခွန် ဒုဝန်ကြီး )
(၆) ဒေါက်တာ ကံဇော် ( လက်ရှိ - စီမံ စီးပွား ဒုဝန်ကြီး )
(၇) ဦးမောင်မြင့် ( လက်ရှိ - ဒုတိယ နိုင်ငံခြားရေး ဝန်ကြီး )
(၈) ဒေါက်တာကိုကိုဦး ( လက်ရှိ - သိပ္ပံ နည်းပညာ ဒုဝန်ကြီး )
(၉) ဦးဌေးအောင် ( လက်ရှိ - ဟိုတယ် ခရီး ဒုဝန်ကြီး )
(၁၀) ဒေါက်တာ ဒေါ်မြတ်မြတ်အုန်းခင် ( လက်ရှိ - ကျန်းမာရေး ဒုဝန်ကြီး)

ရွာနေရာမပြောင်းလိုသော ကလုံထကျေးရွာ အီတာလျံထိုင်းဒုဥက္ကဋ္ဌ လာရောက်စည်းရုံး

 

        ထားဝယ်ရေနက်ဆိပ်ကမ်းစီမံကိန်းပြပုံ

ရန်ကုန်၊စက်တင်ဘာ-၄

ထားဝယ်ရေနက်ဆိပ်ကမ်းနှင့် အထူးစီးပွားရေးဇုန်တွင် ရေပေးဝေမည့် ကလုံထဆည်စီမံကိန်းကြောင့် ပြောင်းရွှေ့ရမည့် ကလုံထကျေးရွာကို

ရွှေ့ပြောင်းပေးရေးအတွက် အီတာလျံထိုင်းကုမ္ပဏီမှ ဒုဥက္ကဋ္ဌမစ္စတာအနန့်က ကျေးရွာသားများနှင့် ရွာဦးဘုန်းတော်ကြီးကျောင်းမှ ဆရာတော်ကို တွေ့ဆုံပြီး စည်းရုံးမှုများ ပြုလုပ်ခဲ့ကြောင်း ကလုံထကျေးရွာမှ ရွာဦးဆရာတော်က မိန့်ကြားသည်။

ဒုဥက္ကဋ္ဌအပါအ၀င် ၁၄ ယောက်အဖွဲ့က မရွှေ့ပြောင်းလို၍ လျော်ကြေးလက်ခံခြင်း မရှိသော ကျေးရွာသားများကို စီမံကိန်းမှာ ကျေးရွာအတွက် ကောင်းကျိုးရှိကြောင်း၊ ပြောင်းရွှေ့မည့်ဆိုပါက မူလထက်မနိမ့်သော လူနေမှုအဆင့်အတန်းအတိုင်း အကောင်အထည် ဖော်ပေးမည်ဖြစ်ကြောင်း၊
စိုက်ပျိုးရေးနည်းပညာများကို ဖြန့်ဝေပေးမည်ဖြစ်ကြောင်း၊ လမ်းလည်းဖောက်ပေးမည်ဖြစ်ကြောင်း ရွာဦးဆရာတော်နှင့် ကျေးရွာသားများကို တွေ့ဆုံစဉ် ပြောကြားခဲ့သည်။

ယင်းကျေးရွာသည် ထားဝယ်ရေနက်ဆိပ်ကမ်းနှင့် အထူးစီးပွားရေးဇုန် စီမံကိန်းရေးဆွဲစဉ် မြေပုံလမ်းညွှန်တွင် မပါဝင်ကြောင်း၊ မဖြစ်မနေစီမံကိန်း
အတွက် တည်ဆောက်ရမည်ဆိုပါက ကျေးရွာသည် ရေမြုပ်ဧရိယာထဲတွင် ပါဝင်သောကြောင့် လွတ်သောနေရာတွင် စီမံကိန်းကို ပြောင်းရွှေ့တည်
ဆောက်စေချင်ကြောင်း ရွာဦးဆရာတော်က မိန့်ကြားခဲ့သည်ဟုလည်း ဆရာတော်က ဆက်လက်မိန့်ကြားသည်။

“သဘောတူ၊ မတူ လာညှိတုန်းဘဲ ရှိသေးတာပါ။ မပြောင်းဘူး။ လက်လည်းမခံဘူး။ သုံး၊ လေးရက်လောက်ကြာရင် လာဦးမယ်လို့ ပြောတယ်”ဟု ဆရာတော်ကမိန့်ကြားသည်။ အီတာလျံထိုင်းကုမ္ပဏီမှ ဒုတိယဥက္ကဋ္ဌက ထားဝယ်ရေနက်ဆိပ်ကမ်းနှင့် ကလုံထကျေးရွာသို့ စက်တင်ဘာ ၂ တွင် သွားရောက်ခဲ့ကြောင်း၊ သို့သော် မည်သည့်အကြောင်းအရာများ ဆွေးနွေးသည်ကိုမသိ၍ မပြောနိုင်ကြောင်း အီတာလျံထိုင်းကုမ္ပဏီမှ တာဝန်ရှိသူတစ်ဦးကပြောသည်။

Ref:7Days News

အပြည်ပြည်ဆိုင်ရာ ဒီမိုကရေစီနေ့ အခမ်းအနားတက်ရောက်မည့် ပါတီကိုယ်စားလှယ်များ စာရင်းကောက်

ရန်ကုန်၊ စက်တင်ဘာ-၁ 

မြန်မာနိုင်ငံတွင် ဒုတိယအကြိမ် မြောက် ကျင်းပမည့် အပြည်ပြည် ဆိုင်ရာ ဒီမိုကရေစီနေ့ အခမ်းအနား တက်ရောက်ရန် နိုင်ငံရေး ပါတီများမှ အမည်စာရင်းကောက် ယူနေပြီဖြစ်ကြောင်း သတင်းရရှိ သည်။

“လွှတ်တော်ရုံးကနေ ပါတီတစ်ခုကိုကို နှစ်ယောက်တက်ဖို့ အမည် စာရင်းတောင်းထားတယ်”ဟု ရှမ်းတိုင်းရင်းသားများ ဒီမိုကရေစီအဖွဲ့ ချုပ်မှ အထွေထွေအတွင်းရေးမှူး ဦးစိုင်းညွန့်လွင်က ပြောသည်။

၁၉၉၀ ရွေးကောက်ပွဲ အနိုင်ရ တိုင်းရင်းသားပါတီများဖြစ်သော ရခိုင်ဒီမိုကရေစီအဖွဲ့ချုပ်ပါတီ ဇိုမီးဒီမိုကရေစီအဖွဲ့ချုပ်တို့ ကို အပြည်ပြည်ဆိုင်ရာ ဒီမိုကရေစီနေ့ အခမ်းအနားသို့ တက်ရောက်ရန် အမည်စာရင်း ကောက်ယူ ထားကြောင်း ၎င်းပါတီများထံမှ သိရသည်။

၂၀၁၂ ခုနှစ် စက်တင်ဘာ လ ၁၅ ရက်တွင် နေပြည်တော် ရှိ လွှတ်တော်အဆောက်အအုံ သဘင်ဆောင်၌ အပြည်ပြည်ဆိုင် ရာ ဒီမိုကရေစီကရေစီနေ့ ကျင်းပသွားမည်ဖြစ်သည်။

ပြီးခဲ့သည့် နှစ်မှစ၍ မြန်မာနိုင်ငံတွင် ပထမဦးဆုံးအကြိမ်အဖြစ် အပြည်ပြည်ဆိုင်ရာ ဒီမိုကရေစီနေ့ကို ကျင်းပခြင်းဖြစ်ပြီး ယင်းသို့ ကျင်းပရန်အတွက် Inter-Parliamentary Union မှ မြန်မာ နိုင်ငံရှိ လွှတ်တော်များထံသို့ စာတစ်စောင်ပေးပို့ကာ တိုက်တွန်းခဲ့ကြောင်း အဆိုပါအခမ်းအနား တွင် ပြည်သူ့လွှတ်တော်ဥက္ကဋ္ဌ သူရဦးရွှေမန်းက မိန့်ခွန်းတွင် ထည့်သွင်းပြောကြားခဲ့သည်။

ယင်းနေ့၌ပင် မှတ်ပုံတင်ထားခြင်း မရှိသေးသော အမျိုးသားဒီမိုကရေစီအဖွဲ့ချုပ်တွင်လည်း အပြည်ပြည်ဆိုင်ရာ ဒီမိုကရေစီနေ့ကို ကျင်းပခဲ့သည်။

၂၀၀၇ ခုနှစ်တွင် ကျင်းပခဲ့သော ကမ္ဘာ့ကုလသမဂ္ဂအထွေ ထွေညီလာခံက စက်တင်ဘာ လ ၁၅ ရက်ကို အပြည်ပြည်ဆိုင်ရာ ဒီမိုကရေစီနေ့အဖြစ် သတ်မှတ်ပေးခဲ့ပြီး ကုလသမဂ္ဂအဖွဲ့ဝင်နိုင်ငံများကိုလည်း ဒီမိုကရေစီဆိုင်ရာ အသိပညာပေးမှုများကို ယင်းနေ့တွင် လုပ်ဆောင်ရန် တိုက်တွန်းခဲ့သည်။
Ref:7Days News

ပြည်သစ် ညွှန့်ဝေ မြန်မာနိုင်ငံသို့ ပြန်လည်ရောက်ရှိ

ယခင်အစိုးရ လက်ထက် ပြည်ပနိုင်ငံသို့ ထွက်ခွာခဲ့ပြီး ပြည်ပ နိုင်ငံတွင် အခြေစိုက်ကာ နိုင်ငံရေး လှုပ်ရှားမှုများ ပြုလုပ် လျှက်ရှိသည့် ပြည်သစ် ညွှန့်ဝေသည် ယနေ့ နံနက် ၈နာရီ ၅၀ မိနစ်က မြန်မာနိုင်ငံသို့ ပြန်လည်ရောက်ရှိ လာကြောင်းသိရသည်။

နိုင်ငံတော် သမ္မတကြီး ဖိတ်ခေါ်မှုအရ လာရောက်ခဲ့ခြင်း ဖြစ်ပြီး မြန်မာနိုင်ငံ ဖွံ့ဖြိုးတိုးတက်ရေး
လုပ်ငန်းများ လုပ်ဆောင်သွား ရန်ရှိကြောင်း ၄င်းက ရန်ကုန်အပြည်ပြည် ဆိုင်ရာလေဆိပ်တွင် သတင်းထောက်များနှင့် တွေ့ဆုံစဉ်ပြောကြားသည်။

ယခင်အစိုးရ လက်ထက်၌ မြန်မာနိုင်ငံတွင် ဖြစ်ပွားခဲ့သော ပေါက်ကွဲမှုဖြစ်စဉ် အချို့နှင့် ပတ်သက်ပြီး ၄င်းအား တရားခံအဖြစ် ယခင်စစ်အစိုးရ လက်ထက် တာဝန်ရှိသူများက စွပ်စွဲထားခဲ့သလို အဝေးရောက် ပြစ်ဒဏ်များလည်း ချမှတ်ထားခဲ့သည်။

အဆိုပါ ကိစ္စရပ်များနှင့်ပတ်သက်၍ မြန်မာနိုင်ငံသို့ရောက်ရှိစဉ် ကာလအတွင်း ဖြေရှင်းသွားမည်မဟုတ်ကြောင်း ၄င်းက ပေါ်ပြူလာနယူးစ်၏မေးမြန်းမှုကိုဖြေကြားခဲ့သည်။

၎င်းသည် မြန်မာနိုင်ငံတွင် ၂၈ ရက် ကြာနေထိုင်ခွင့်ရရှိထားပြီး နိုင်ငံတော်သမ္မတကြီးအပါအ၀င် သက်ဆိုင်ရာတာဝန်ရှိသူများ၊နိုင်ငံရေးအဖွဲ့အစည်းများ၊အလုပ်သမားအဖွဲ့အစည်းများနှင့်တွေ့ဆုံသွားမည်ဟု သိရသည်။

Popular Myanmar News Journal